CENTRAL VISAYAS-Labing menos 640 ka mga tawo ang nadakpan sa usa ka ‘well-coordinated’ nga serye sa mga operasyon nga gihimo sa panahon sa tulo ka adlaw nga dungan nga anti-criminality law enforcement operations nga nagsugod kaniadtong Marso 10 hangtod Marso 12, 2024.
Nakuha gikan sa nasangpit nga mga operasyon ang 3,305.10 gramos sa gituohang shabu nga nagkantidad og PhP22,474,680.00 ug 32 gramos nga marijuana nga nagkantidad og PhP3,840.00, standard nga presyo sa drugas, gikan sa nasikop nga 180 ka mga drug personalities samtang 327 ka mga illegal sugarol ang nasikop ug nasakmit og PhP.600,600.
Ang mga operasyon batok sa loose firearms miresulta usab sa pagkarekober sa 139 ka wala rehistradong armas ug pagkasikop sa 13 ka mga suspek.
Dugang pa, adunay 120 ka pending nga warrant of arrest ang napatuman sa 3 ka most wanted persons ug 117 ka ordinary wanted persons.
Ang nasangpit nga mga dinakpan anaa sa kustodiya sa kapolisan alang sa tukmang pagpasaka og kaso sa korte samtang ang tanang nakumpiska nga mga ebidensiya sa tanang operasyon sa kapolisan gisumite na ngadto sa Forensic Unit alang sa eksaminasyon.
Subay niini midayeg si PBGEN ANTHONY A ABERIN, PRO7 Regional Director, sa mga kalalakin-an ug kababayen-an sa Police Regional Office 7 sa ilang walay puas nga pasalig ngadto sa usa ka limpiyo nga komunidad sa Central Visayas.
