CENTRAL VISAYAS-Gimonitor sa Police Regional Office 7 nga bag-ong giilang mga drug personalities nga nag-operate sa tibuok Central Visayas.
Kini ang gibutyag ni Police Lieutenant Colonel Gerard Ace Pelare, ang tigpamaba sa PRO-7 nga gawas sa maong mga personalidad, ila usab nga gitan-aw ang usa ka drug group nga gituohang mao’y nangulo sa illegal drug trade sa rehiyon.
Dugang pa, nga ang PRO-7 nihimo og link diagram o matrix sa maong mga indibidwal nga giingong kumpirmado nga drug personality, ug adunay mga warrant of arrest.
Matud sa opisyal nga ang mga ilhanan sa mga personalidad naggikan sa impormasyon nga gibutyag sa kapulisan sa gipahigayong custodial debriefing sa mga drug suspect nga ilang nasikop sa anti-illegal drug operations.
Giklaro usab ni Pelare nga ang supplier sa mga ilegal nga drugas sa Central Visayas wala sa dakbayan sa Sugbo o sa rehiyon-7.
Base sa information validation, si Pelare niingon nga dili mominos sa 50 ka mga downline sa maong grupo ang ilang na-monitor, apan hapit na sila ma-neutralize human nasikop ang kadaghanan sa mga indibidwal.
Kasamtangang gipahingusgan na ang demand reduction strategy ug ang pag-ila sa mga drug hotspot areas aron mahimo ang interbensyon subay usab sa direktiba sa regional director sa PRO-7.
