CEBU CITY-Taliwa sa sunod-sunod nga krimen hilabi na nga adunay kalambigitan sa pagpamusil, kusganon gihapong gibarugan sa kapulisan nga adunay pagkunhod sa crime rate sa dakbayan sa Sugbo.
Mao kini ang gibutyag ni Police Col. Ireneo Dalogdog, ang City Director sa Cebu City Police Office nga ang ilang gibasehan ang gikan sa datos nga ilang natala.
Gipasabot usab sa opisyal nga adunay lain-laing klase sa krimen nga adunay nagkadaiyang porsyento sa matag partikular ingon man nga adunay taas niini apan, kung maghisgot sa kinatibuk-an, mipasalig kini nga adunay pag-us-os sa krimen base sa ilang record.
Gani, gipahimangnoan niini ang katawhan nga dili magbase sa mga hungihong.
Subay niini, padayon usab ang panawagan sa mga kapulisan nga makigkooperar sa mga kalihokan ingon man sa pagtuldok sa mga illegal nga buhat arun matuman ug mamintinar ang kalinaw ug kahapsay sa dakbayan sa Sugbo.
Gihatagan usab og gibug-atan ni Dalogdog nga dako ang tabang sa katawhan arun makab-ot ang pagpatuman sa kalinaw sama sa pagpahibalo sa ilaha kung adunay mga kadudahan nga mga tawo ug uban pa.
