LILOAN, CBEU-Patay ang 11-anyos nga batang lalaki human ang gisakyan niini nga motorsiklo nadasmagan sa dumptruck sa Barangay Jubay, lungsod sa Liloan sa amihanang Sugbo.
Ang motorsiklo gimaneho sa amahan sa bata dihang nahitabo ang aksidente.
Basi sa imbistigasyon sa kapulisan sa Liloan Police Station, ubos sa pagdumala ni Police Major Eric Gingoyon, samtang ang duha ka mga sakyanan nagbiyahe paingon sa amihanan, ang dump truck nagmaniobra paingon sa gawas nga lane og niliko nga miresulta sa pagkabangga sa motorsiklo.
Hinungdan sa kamatayon sa usa ka batang lalaki nga giilang si Johannes Earl G. Dungog, kinsa nga backride sa iyahang amahan nga si Rogelio Icot Dungog Jr., drayber sa maong motorsiklo nga Honda Beat nga mga lumulupyo sa Bonifacio St. Poblacion, Lapu-Lapu City, Cebu.
Samtang sa pikas bahin, giila ang drayber sa dump truck nga si Lemuel Capacite Mojillo, 45-anyos, taga Lawaan III, Talisay City, Cebu.
Kasamtangan anaa sa Liloan Municipal Police Station si Mojillo samtang naghuwat sa pagpasaka tukmang kaso nga Reckless Imprudence Resulting to Homicide, Physical injury and Damage to Property.
