CEBU CITY-Gihimakak sa 33-anyos nga habal-habal driver kinsang gidakop sa kapulisan sa Mambaling gumikan sa alegasyon nga gikulata niini ang iyang 34-anyos nga live-in partner tungod sa pagdumili sa pagpakighilawas kaniya.
Matud pa nga sukwahi kini sa nanggawas nga mga taho nga gikulata niini ang iyang kapuyo ug giingong nanglabay og lingkoranan human nasuko nga wala kini makahimo og lawasnong kalipay.
Gani, nanawagan kini sa iyahanag kapuyo nga dili ipadayun ang reklamo batok sa dinakpan gumikan mamahimo lamang kini nilang storyahan isip managti-ayun, ilabi na hugot niyang gibarugan nga wala siya’y sala nga nabuhat niini.
Giila ni Police Major John Lynbert Castigador Yangco, ang hepe sa kapulisan sa Mambaling Police Station, ang mag live-in nga sila si Ranie ‘Bong’ Cardaño Tagalog, 33-anyos, ang gipasanginlang nangulata samtang ang biktima nga si Dyesebel Alon Catalan, 34-anyos ug ang duha adunay tulo na ka mga anak.
Dugang pa, nga adunay panaglalis ang duha ug misangpot sa pagpanapat ni Tagalog ngadtu kang Catalan, kung diin iyaha kining gibunalan ug gihapak ang iyang likod, abaga ug tiil.
Asoy sa opisyal, nga matud sa asawa wala kini makontento gani, nakahinayak kini og bunal og plastic nga lingkoranan.
Sa pagkakaron, padayon pa nga anaa sa tambalanan ang biktima samtang gipaabot kon mopasaka ba kini og kaso batok sa iyang kapuyo human sa nahitabong insidente.
