CEBU CITY-Gihatagan og katin-awan ni Cebu City Mayor Michael Rama nga ang pagtabang sa Kagamhanan sa Dakbayan sa Sugbo sa Local Water Utilities Administration nga makasulod sa Metropolitan Cebu Water District nga wala’y sagol nga pamulitika.
Human kini mas nitaas ang tensiyon niadtong Lunes sa dihang si Atty. John DX Lapid, gitudlo sa LWUA isip office-in-charge general manager sa MCWD kinsang gibabagan nga makasulod sa MCWD building tungod sa mando sa kasamtangang BOD nga gipangulohan ni chairman Joey Daluz ug general manager Edgar Donoso.
Gihimug-atan pa sa mayor nga ang batas anaa sa iyang kiliran ingon man sa LWUA hinungdan nga kinahanglan lig-on ang LWUA gumikan ang gibuhat lang nila usa ka puro nga pagserbisyo.
Sa pikas bahin, tungod usab sa mga pagsaway nga nadawat ni Atty. Lapid human sa iyang pagkatudlo isip MCWD acting General Manager nga miresulta sa kadaot sa iyang pamilya hinungdan nga miluwat kini og pamahayag nga mokanaog sa maong posisyon.
Kahinumduman nga gipaambit niini ang iyang usa sa mga rason sa pagdawat sa maong posisyon taliwala sa nanggawas nga hungihong sama sa pagtraydor ug pagbaligya sa iyang mga kauban apan, kusganong gibarugan niini nga gusto lang kini nga motabang ug moserbisyo.
