Gimando ni Presidente Ferdinand Marcos Jr ngadto sa Department of Migrant Workers (DMW) aron mahatagan og suporta ang 20 ka Pinoy seafarers nga naapektuhan sa pag-atake sa Red Sea.
Matod ni DMW Sec. Hans Leo Cacdac, anaa sa luwas nga kahimtang ang mga Pilipino ug padayon usab nga nakigtagbo ang DMW sa mga pamilya sa mga seafarer.
Gipasalamatan ni Cacdac ang Department of Foreign Affairs (DFA) sa padayon nga suporta niini aron masiguro ang kaluwasan sa mga Filipino seafarers ug ang padayon nga komunikasyon niini sa mga awtoridad sa Iran sa local manning agency kalabot sa kahimtang sa 3 ka Filipino seafarers sakay sa MSC Aries.
Kahinumduman nga adunay 3 ka Filipino seafarer nga sakay sa container ship nga MSC Aries dihang gilikosan kini sa mga awtoridad sa Iran niadtong Abril 13 samtang adunay 17 ka Filipino seafarer sakay sa Roro vehicle carrier nga Galaxy Leader dihang giatake kini sa mga rebeldeng Houthi sa Pulang Dagat niadtong Nobyembre sa miaging tuig.
