Gidawat sa pamilya sa beteranong aktres nga si Eva Darren ang pagpangayo og pasaylo sa FAMAS o Filipino Academy of Movie Arts and Sciences kalabot sa nahitabong snubbing incident atol sa awards night sa maong award-giving body.
Matod sa online post sa anak sa beteranong aktres nga si Fernando de la Pena, giimbitar sa FAMAS ang iyang inahan nga mopresentar sa maong award kauban ang aktor nga si Tirso Cruz III.
Gidawat sa aktres ang maong imbitasyon ilabi na kay ang kataposang higayon niya sa FAMAS niadtong 1969 diin si Eva Darren maoy nakadaog sa Best Supporting Actress award alang sa iyang salida nga “Ang Pulubi”.
Apan atol sa maong pasidungog, wala tawga si Eva Darren ug lain na ang kauban si Cruz sa entablado.
Sa post sa pagpangayo og pasaylo sa FAMAS, apil ang aktres sa maong programa apan wala na makit-an ang iyang nahimutangan busa nakahukom ang production team nga mobira og laing aktres puli kang Eva Darren aron ipresentar ang award uban ni Cruz.
Dugang pa sa organisasyon nga live ang nasangpit nga show busa gikinahanglan nga masulbad dayon ang problema, apan gipasabot nga dili kini tinuyo ug pagpabaya sa ilang grupo.
Giklaro sa anak sa aktres nga sa atubangan ug tunga sa stage naglingkod ang iyang inahan kauban ang ubang beteranong aktres nga sila si Divina Valencia ug Marissa Delgado.
Unang gitawag sa kabanay sa aktres ang nahitabo nga ‘disrespectful, unethical, and unprofessional.’
Apan giingong gidawat sa ilang pamilya ang pagpangayo og pasaylo sa FAMAS ug nanghinaot nga dili na masubli ang maong insidente.
Ingon man nga nagplano ang management sa FAMAS nga bisitahon si Eva Darren aron personal nga makig-estorya kaniya ug mohatag og pasidungog sa iyang kontribusyon sa industriya.
