Naigo sa air strike sa Israel ang usa ka tunghaan sa United Nations Relief and Works Agency for Palestine Refugees (UNRWA) sa refugee camp sa central Gaza nga mipatay sa 27 ka mga tawo.
Nasayran nga ang naasoy nga eskwelahan kay nagsilbi usab nga dangpanan sa gatusan nga mga bakwit.
Sumala sa Israeli Defense Forces, ilang gilusad ang maong pag-atake sa UN school sheltering sa Hamas compound, butang nga gilimod sa Hamas.
Ug matud pa sa Israeli military nga ilang napatay ang mga teroristang Hamas ug Islamic Jihad nga miapil sa pag-atake niadtong Oktubre 7 sa habagatang Israel.
Gipahibalo sa IDF nga naghimo kini og mga lakang sa wala pa ilunsad ang air strike aron mamenosan ang risgo sa mga sibilyan nga kaswalti.
Giingong nagpalupad ang Israeli warplane og 2 ka missiles sa mga classroom sa taas nga andana sa eskwelahan sa Nuseirat refugee camp.
Ang mga rescue team ug mga ambulansya nagdali sa mga nasamdan ug ang mga namatay sa pag-atake sa duol nga ospital.
