PROVINCE OF BOHOL-Patay ang lima ka buwan nga batang lalaki samtang naangol ang mga ginikanan niini human ang gisakyan nilang motorsiklo nabangga sa laing motorsiklo sa national highway sa Barangay Kalunasan, lungsod sa Calape, Bohol, niadtong Huwebes, Hunyo 13, 2024.
Sa imbestigasyon sa Calape Police Station, nasuta nga ang 21-anyos nga inahan sa biktima ang nagmaneho sa motorsiklo samtang ang iyang live-in partner nagkupot kaniya sa likod human gikan sa lungsod sa Inabanga paingon sa siyudad sa Tagbilaran.
Apan matud pa sa pipila ka mga saksi, kalit nga mitipas sa pikas linya sa kalsada ang motorsiklo nga gisakyan sa mga biktima og nibangga sa kasugat nga motorsiklo.
Human nabanggaan ang kasugat nabangga kini og otro sa usa ka tricycle.
Gidali og rescue ang batang biktima apan nakabsan kini og kinabuhi.
Samtang ang iyang mga ginikanan anaa usab sa tambalanan nga naka-angkon og daghang angol sa kalawasan.
Nasuta nga sa wala pa ang panghitabo ang bata ilahang gipa-check-up.
