CEBU CITY-Gipakusgan sa kapulisan sa Sugbo ang ilang pagpangandam aron maseguro ang hugot nga seguridad sa mga atleta ug delegado nga gikan sa nagkadaiyang rehiyon sa Pilipinas sa umaabot nga Palarong Pambansa sa Hulyo 2024.
Kini ang gitino ni Police Colonel Ireneo Dalogdog, ang hepe sa kapulisan sa Cebu City Police Office, nga nakigtagbo ang kapulisan niadtong miaging semana sa mga representante sa kagamhanan sa dakbayan ug sa Department of Education aron tukion ang gikinahanglang pagpangandam alang niining mahinungdanong kalihokan.
Gibutyag ni Dalogdog nga kinahanglang mopakatap sila og daghang mga pulis ning panahona sanglit ilang gipaabot nga mokapin sa 20,000 ka mga delegado, wala pay labot ang mga pamilya sa mga atleta nga mouban kanila.
Tuyo sa kapolisan sa dakbayan nga zero-crime event ang Palarong Pambansa hinungdan nga butangan ug daghang kapulisan ang mga venue ug billeting area aron masiguro ang kaluwasan sa mga atleta.
Usa sa ilang mga nag-unang gikabalak-an mao ang pagpugong sa pagpangawat ug uban pang mga krimen nga nagpunting sa mga delegado, lakip ang mga kriminal gikan sa silingang mga rehiyon ug probinsya.
Hinuon, wala pa makadesisyon ang Cebu City Police Office (CCPO) sa tukmang gidaghanon sa mga police personnel nga gikinahanglan aron masiguro ang seguridad sa Palarong Pambansa.
