Nakadawat og saad ang delegasyon sa kongreso sa Pilipinas nga gipangulohan ni Speaker Martin Romualdez gikan sa mga opisyal sa parliament sa Japan nga ang Japan mokuha og dugang mga trabahanteng Filipino sa mga kritikal nga sektor sama sa pag-atiman sa mga tiguwang.
Diin ang pasalig nakuha atol sa high-level discussions uban sa National Diet of Japan Speaker Fukushiro Nukaga ug Vice-Speaker Banri Kaieda nga gipahigayon sa Tokyo parliamentary building.
Sa maong panagtagbo, giila ni Vice-Speaker Kaieda ang mga hagit nga giatubang sa Japan ug ang importanteng kontribusyon sa mga Filipino.
Hinungdan nga gipanglantawan kini sa speaker nga potensyal nga mapalig-on pa ang kooperasyon sa duha ka nasud.
Giingong makatabang usab kini sa mga Pilipino nga makabaton og bag-ong kahibalo bahin sa teknolohiya nga anaa sa Japan.
Sa samang tigom, si Speaker Nukaga misaad usab nga magpadayon sa pagtabang sa ekonomiya sa Pilipinas.//
Matud pa nga adunay 1,400 ka Japanese companies nga nag-operate sa Pilipinas.
Nagpasalamat usab si Speaker Romualdez sa padayon nga suporta sa Japan sa mga Filipino.
Adunay kapin sa 300,000 ka mga Filipino nga nagpuyo sa Japan diin 164,000 niini anaa sa caregiving, agriculture, hospitality, ug manufacturing sectors.
Giila usab ni Speaker Romualdez ang suporta sa Japan sa ekonomiya sa Pilipinas pinaagi sa official development fund (ODA).
Si Speaker Romualdez niingon nga ang Japan International Cooperation Agency (JICA) aduna usab importanteng kontribusyon sa Pilipinas.
Matod ni Speaker Romualdez, ang makasaysayanong kasabutan tali sa Estados Unidos, Japan, ug Pilipinas mas nakapalig-on sa ilang asosasyon.
Agi’g tubag, giila ni Speaker Nukaga ang lig-on nga relasyon tali sa Pilipinas ug Japan.
Giila usab ni Nukaga ang importansya sa mga Pilipino sa Japan, ilabi na sa Ibaraki Prefecture nga mao’y iyang lungsod nga natawhan.
Matod ni Nukaga, kinsa kanhi chair sa parliamentary group ug Minister of Finance sa JICA, ang Pilipinas mao ang ikatulo nga labing dako nga nakadawat sa ODA sa Japan, sunod sa India ug Bangladesh.
Gipasiugda usab ni Nukaga ang kamahinungdanon sa relasyon tali sa Pilipinas, Japan, ug Estados Unidos.
Gihisgotan usab ni Nukaga ang bag-ohay nga joint maritime exercise sa Japan, US, Pilipinas ug Canada nga matod niya pamatuod niini nga kooperasyon.
Gipasiugda usab ni Nukaga ang kamahinungdanon sa prinsipyo sa seguridad, demokrasya, ug pagmando sa balaod.
