Gipaabot sa Probinsiya sa Sugbo ang labing menos 300 ka mga delegado nga motambong sa United Nations Tourism Organization (UNTO) Joint Commission Forum nga gikatakda dinhi sunod semana, gikan sa Hunyo 26 hangtod 28.
Gikan sa labing menos 30 ka UNTO-member nga mga nasud sa tibuok Asia ug Pasipiko – lakip ang Australia, Japan, China, South Korea, Malaysia, Indonesia, Papua New Guinea, Laos, Vietnam, ug Spain, ug uban pa ang mga delegado.
Gilauman usab nga motambong ang 36th Joint Meeting sa UN Tourism Commission alang sa East Asia ug sa Pacific ug sa UN Tourism Commission alang sa South Asia.
Mahitabo usab dinhi atol sa maong mga petsa ang makasaysayanon nga unang UN Tourism Regional Forum on Gastronomy Tourism para sa Asia ug Pasipiko tungod kay ang Pilipinas, pinaagi ni Tourism Secretary Christina Garcia-Frasco, midala sa mga tahas sa pagpangulo sa UNTO.
Gitakda sa Hunyo 27, ang technical tour adunay usa ka grupo nga magpatuyang sa island tour sa Camotes Group of Islands.
Laing grupo ang mosuhid sa kabilin nga turismo sa Dalaguete ug Argao, ug ang ikatulong grupo mopaingon sa Aloguinsan alang sa eco-tour sa Hermit’s Cove ug Bojo River Cruise.
Atol sa coordination meeting sa Kapitolyo nga gitambungan sa mga mayor, mga opisyal sa turismo, ug uban pang stakeholders niadtong Hunyo 21, si Cebu Provincial Governor Gwen Garcia nga nipahibawo nga ang Kagamhanan sa Probinsiya mopagawas og subsidyo sa mga LGUs nga mahimong kabahin sa kalihukan, partikular na ang mga destinasyon sa bisitahon sa mga delegado.
Usa ka Gala Night ug Fashion Show usab ang ipahigayon sa Kapitolyo karong petsa 27 human sa ilang technical tours.
Karong tuiga, napili ang Pilipinas nga mo-host sa importanteng UNTO fora human si Sec. Cristina Frasco napili isip Bise Presidente sa 25th General Assembly sa UNTO ug chairperson sa UNTO Commission for East Asia and the Pacific.
