Wala matarog ang Philippine Coast Guard (PCG) sa presensya sa Chinese monster ship nga naka-angkla sa Escoda shoal.
Giinsister sa tigpamaba sa PCG sa West Philippine Sea nga si Commodore Jay Tarriela nga dili mahadlok o moatras ang PCG ug dili momando sa BRP Teresa Magbanua nga mobalik sa Palawan subay sa mando sa Presidente ug sa tuyo sa mga PCG Commandant nga ipabilin ang ilang presensya sa Escoda shoal.
Unang gipahibalo ni Comm. Tarriela nga gideploy ang CCG 5901 o Monster ship sa Escoda shoal aron hadlokon ang PCG 9701 o BRP Teresa Magbanua.
Kalabot niini, ang PCG 9701 o BRP Teresa Magbanua nagpahigayon og radio challenges sukad sa pag-abot sa higanteng barko sa China sa shoal.
Matod ni Tarriela nga ang PCG mopahigayon og radio challenge sa matag higayon nga ang habig sa Chinese mohimo og mga kadudahang kalihokan sama sa deployment sa rigid-hull inflatable boats.
Hinuon dili direktang tubagon sa habig sa China kung unsa ang ilang katuyoan sa maong lugar ug nagpahigayon usab sila og lehitimong operasyon sa ilang Coast Guard tungod kay giingong aduna silay soberanya sa maong kadagatan.
