METRO MANILA-Mipirma ang United States Agency for International Development (USAID) ug ang Public-Private Partnership Center (PPPC) sa usa ka kasabotan uban ang tumong sa pagpalambo sa usa ka collaborative framework alang sa pagpatuman sa mga proyekto sa PPP sa nasud.
Ubos sa kasabutan, ang USAID ug PPPC magtinabangay alang sa pagpalambo, ebalwasyon, ug pag-uyon sa mga proyekto.
Bisan ang pagpalit sa mga ekipo alang sa proyekto ug pagpatuman niini moagi usab sa pagtinabangay sa duha.
Sumala sa USAID economic growth specialist ug private sector engagement co-lead Jay de Quiros, ang duha magtinabangay aron maseguro nga ang ‘komon nga tumong’ sa pribado ug publikong sektor maabot.
Matod niya importante kini aron matigom ang kahanas sa duha ka sektor alang sa mga proyekto nga tukoron ug puhunan sa nasud.
Ang Public-Private Partnership mao ang nag-unang pamaagi nga gigamit sa administrasyong Marcos sa mga dagkong proyekto sa nasud, sama sa mga dam, mga proyekto sa transportasyon ug uban pang pasilidad.
