CEBU CITY-Narekober ang usa sa tulo ka mga motorsiklo nga gigamit sa mga tulisan sa pagpanglungkab sa duha ka tindahan sa alahas pasado alas 11 sa buntag niadtong Huwebes, Agosto 8, 2024, sa dalan Calderon sa Barangay Ermita, dakbayan sa Sugbo.
Kini ang gikumpirma ni Carbon Police Station Chief Major Philip John Libres, diin giangkon sa opisyal nga nakuhaan sa CCTV camera ang motorsiklo nga giabandonar sa maong dapit human mibalhin og laing sakyanan ang mga tulisan.
Nangayo na si Libres og pagtugot sa Land Transportation Office aron masusi ang mga dokumento sa rehistrasyon sa motorsiklo ug maghimo og macro itching sa makina.
Base sa kuha sa CCTV, duha ka mga lalaki ang nakita nga nagsakay sa maong motorsiklo ug nag-park sa luyo nga bahin sa dakong tindahan sa Burgos alas 11 sa buntag ug human niadto, milabang sila sa dalan dala-dala ang usa ka dakong bag.
Dugang pa, nga ilang subayon ang CCTV footage aron masuta kon asa gyud sila nanaog sa motorsiklo dihang miikyas.
Ang duha ka motorsiklo niliko sa dalan Lincoln samtang ang usa nidiretso sa Carbon Public Market.
Nihangyo na sa publiko ang kapulisan sa dakbayan nga tabangan sila sa pag-ila sa mga sad-an dungan sa pagsaad nga masulbad dayon kini.
Gitug-an ni Libres nga human sa krimen, ilang gi-review ang matag CCTV clip sa kadalanan sa downtown Sugbo nga posibleng agian sa mga tulisan.
Nakig-alayon na kini sa Criminal Investigation and Detection Group – Central Visayas (CIDG 7), ug National Bureau of Investigation (NBI 7) aron sa pagsulbad sa maong krimen.
