Nipasalig ang Kagamhanan sa Probinsiya sa Sugbo nga suportahan ang “Program 29” sa National Food Authority Region 7 basta masustiner lang kini.
Kini human ang officer-in-charge regional manager sa NFA-7 nga si Ovelito Baritua nangayo og tabang sa Kapitolyo aron madumala ang bag-ong programa sa ilang ahensya nga naglantaw sa pagbaligya sa NFA rice buffer stocks sa tag P29 lang kada kilo.
Sama sa gikataho, ang mga indibidwal nga nahisakop sa huyang nga sektor mao ang mahimong makapahimulos sa tanyag sa programa, lakip niini ang mga person with disabilities, solo parents, senior citizens, ingon man mga lumad.
Matod sa Kapitolyo, andam motabang si Cebu Provincial Governor Gwendolyn Garcia sa NFA-7 basta malungtaron lang ang naasoy nga programa.
Ang programa, kon iduso, i-integrate sa kasamtangang QR-coded card system sa Kapitolyo nga “Sugbo Merkadong Barato” nga magseguro sa mas hapsay ug mas efficient nga operasyon.
Bisan og dili ang Sugbo ang nag-unang producer sa bugas sa nasud, si Baritua nipasalig sa probinsiya nga makig-alayon ang NFA-7 sa ubang nag-unang mga rehiyon nga nagproduce og bugas aron magarantiya ang luwas nga suplay alang sa programa.
