METRO MANILA-Malampusong naapod-apod sa Department of Agrarian Reform ang kinatibuk-ang 114,000 ka luna sa yuta ngadto sa ilang napiling mga mag-uuma nga benepisyaryo.
Matod ni Agrarian Reform Secretary Conrado Estrella III, taas ang porsiyento sa ilang pag-apod-apod sa yuta sukad pa sa miaging tuig hangtod karon.
Ang kalihim mihimo sa maong pamahayag atol sa budget deliberation sa DAR alang sa ilang sunod tuig nga budget.
Mokabat kini sa kapin sa P11.1 bilyones ka pesos alang sa ilang mga proyekto ug programa.
Gikan sa maong kantidad sa yuta, anaa sa 113,914 ka Agrarian Reform Beneficiaries sa ahensya ang nakabenepisyo niini.
Gipasigarbo usab sa kalihim nga mas taas kini sa miaging administrasyon sa samang panahon.
Samtang, gipasiugda sa DAR ang dakong papel sa Department of Environment and Natural Resources (DENR) ug Land Registration Authority (LRA) alang sa pagpadali sa proseso sa pag-ayo sa mga titulo sa yuta.
