Giangkon sa kampo ni kanhi Iloilo City Mayor Jed Patrick Mabilog nga usa sa rason nganong nibalik siya sa Pilipinas kay mao ang nagpadayong Quad Committee hearings sa Kamara.
Kini tungod kay hisgutan ang mga kalapasan sa balaod sa nangaging administrasyon ni kanhi presidente Rodrigo Duterte.
Matod ni Atty. Jeric Jucaban, nagtuo si Mabilog nga pinaagi sa maong hearing daghan ang maklaro lakip na niini ang paglimpyo sa mga pangalan nga namansahan sa mga alegasyon.
Hinuon, ilang giangkon nga “under process” pa ang iyang posibleng pagtungha sa Quad Committee.
Busa unahon niya ang pipila ka importanteng butang, lakip na ang pag-atubang sa iyang kaso ug uban pang pending sa iyang pagbiya sa nasod.
Kahinumduman nga pito ka tuig nga nagpabilin sa gawas sa nasud si Mabilog, human nahimong sentro sa pagsaway ug hulga ni kanhi Presidente Duterte.
