Wala’y bag-ong kasabutan sa pagtugot sa Ukraine nga mogamit og mga long-range missiles gikan sa Kasadpan aron mo-target sa sulod sa Russia pagkahuman sa pakigpulong tali sa Presidente sa US nga si Joe Biden ug UK Prime Minister Keir Starmer sa summit sa palisiya sa gawas nga gihimo sa White House.
Gikumpirmar kini sa UK PM sa dihang gipangutana kung nakombinsir ba niya si Biden nga tugutan ang Ukraine nga buhian ang mga long-range nga Storm Shadow missiles sa Russia.
Matod niya, dugay og produktibo ang ilang panag-istoryahanay sa pipila ka mga isyu lakip na ang Ukraine, Middle East ug Indo-Pacific apan wala’y desisyon kalabot sa isyu sa paggamit sa maong armas.
Sa bahin sa White House, kini nagpahayag sa dakong kabalaka sa paghatag sa makamatay nga mga hinagiban sa Iran ug North Korea ngadto sa Russia.
Unang nipahimangno si Russian President Vladimir Putin sa mga nasud sa Kasadpan sa usa ka posible nga gubat kung tugotan ang Ukraine nga mogamit sa mga long-range missiles batok sa Russia.
Sumala kang Putin, ang maong lakang nagpakita sa direktang partisipasyon sa NATO sa gubat sa Ukraine.
Ingon man nga gibalik-baliksa Ukraine ang pag-awhag sa UK ug US nga tugutan kini nga mogamit og mga long-range missiles batok sa mga target sulod sa Russia.
