Mitaliwan na ang usa sa mga miyembro sa Jackson 5, nga si Tito Jackson sa edad nga 70-anyos.
Siya ang ikatulo sa siyam ka managsuong Jackson lakip ang anhing Michael ug Janet.
Gikompirmar kini sa iyang mga anak nga sila si TJ, Taj ug Taryll apan wala nila hisguti ang hinungdan sa iyang kamatayon.
Ang Jackson 5 naglangkob sa managsuong Jackie, Tito, Jermaine, Marlon ug Michael.
Diin ang grupo sa pamilya gisulod sa Rock & Roll Hall of Fame niadtong 1997.
Pipila sa mga kanta nga ilang gipasikat mao ang “ABC”, “I Want You Back” ug “I’ll Be There”.
Ang grupo nahimong dako nga ngalan sa musika ubos sa pagpangulo sa ilang amahan nga si Joe Jackson, usa ka gitarista ug steelworker nga nagsuporta sa iyang asawa ug siyam ka mga anak sa Gary, Indiana.
Natawo niadtong Oktubre 15, 1953 ug ang iyang tinuod nga ngalan mao si Toriano Adaryll “Tito” Jackson diin dili kaayo siya madunggan sa grupo tungod kay nagsilbi siya nga background singer ug guitarist.
Ang iyang mga igsoon adunay solo nga karera lakip si Michael nga namatay sa edad nga 50 kaniadtong Hunyo 25, 2009.
