MUNTINLUPA CITY- Patay ang usa ka opisyal nga nadistino sa Muntinlupa City Police Station ug iyang asawa samtang kritikal ang 12-anyos nga dalagita nilang anak human gipusil sulod sa ilang balay sa Block 7, Lot 4, Tierra Villas, L&B 2, Ilaya Street, Alabang bandang 1: 10 a.m. Lunes, Setyembre 16, 2024.
Giila ang mga namatay nga sila si Police Captain Aminoden Sanchez Mangonday, aktibong sakop sa Philippine National Police, sa Class Huwarang Lipi 2019, 40 anyos ug asawa niini nga si Mary Grace Ramirez Mangonday, 40, negosyante.
Base sa asoy sa mga saksi, nasayran nga ang suspek usa ka lalaki nga taas og buhok, 5’9” ang gitas-on, nagsuot og itom nga jacket ug itom nga karsones.
Nasayran nga gisulod sa suspek ang balay sa pamilyang Mangonday ug way puas nga gipaulanan og bala ang pamilya hinungdan sa kamatayon sa magtiayon.
Sama sa tradisyon sa mga Muslim, ang magtiayon gidala dayon sa ilang katapusang kapahulayan.
Samtang, gikondena sa PNP ang linuog nga pagpatay kang PCpt Mangonday ug sa iyang asawa, nga naila nga buotan ug matinud-anon nga alagad sa publiko, dali duolon ug responsable ug mahigugmaong amahan sa iyang asawa ug duha ka anak.
Sa laing bahin, nanawagan ang PNP sa kooperasyon ug tabang sa katawhan aron mapadali ang pagresolba ug mahatagan og tulubagon ang mga suspek nga nagpaluyo sa pagpatay.
Sa pikas bahin, Gikondena ni Muntinlupa Mayor Ruffy Biazon ang pagpatay sa magtiayon.
Matod sa mayor nga iyang gitahasan ang iyang mga polis nga maoy mosulbad sa pagpatay kang Police Captain Aminoden Mangonday ug sa iyang asawa nga si Mary Grace.
