BATANES- Liboan ka mga panimalay ang nangaguba sa probinsya sa Batanes tungod sa paghapak sa Super Typhoon Julian.
Matud ni Batanes Gov. Marilou Cayco, anaa sa 60% sa 2,463 ka apektadong panimalay ang nangaguba samtang 40% ang partially damaged.
Gipasanginlan sa opisyal nga daghan ang nangaguba nga mga balay tungod sa dili lig-on nga pundasyon sa mga balay tungod kay kini ginama sa light materials sama sa kahoy o tubo sukad nahimo nang protected area ang tibuok probinsiya.
Maong nanawagan ang Gobernador, kung mahimo, ang moratorium sa balaod nga nagdili sa paggamit sa mga aggregates alang sa pagtukod og mga balay tungod kay kini kanunay nga maigo sa mga bagyo.
Ubay-ubay usab nga mga pasilidad ang nakaangkon og kadaot sama sa Batanes General Hospital tungod sa epekto sa bagyo.
Nasinati usab sa probinsiya ang pagkawala sa suplay sa kuryente ug tubig.
Samtang, walay gikatahong namatay sa ilang probinsiya taliwala sa pagkusokuso sa bagyong Julian.
Sa pagkakaron, kapin sa 2,000 ka mga indibidwal ang gipabakwit sa mga evacuation center.
