Posible nga maglunsad ang China og military drills sa palibot sa Taiwan karong semanaha nunot sa maisugon nga pamahayag ni Taiwan President Lai Ching Te nga imposible nga ang China mahimong ‘motherland’ sa Taiwan.
Giingong mao kini ang nakapasuko sa China, nga dugay nang nagtinguha sa paghiusa pag-usab sa Taiwan, nga giisip niini nga bahin sa ilang teritoryo.
Sa pakigpulong ni Pres. Lai, iyang gipasiugda nga ang Taiwan usa ka soberanya ug independente nga nasud.
Matod niya, kon edad ang hisgutan, medyo edaran na ang Taiwan kay gikatakdang magsaulog sa ika-113 nga adlawng natawhan sa Oktubre 10 samtang ang People’s Republic of China nagsaulog lang sa ika-75 nga adlawng natawhan niadtong Oktubre 1.
Sa pagkakaron wala pa motubag ang China, apan matod sa usa ka senior Taiwan security official nga basi sa intelligence nga nahipos sa Taiwan ug sa assessment sa gobyerno, posibleng mopahigayon ang China sa gitawag niini nga Joint Sword-2024B exercises.
Kahinumdoman nga niadtong Mayo, naglunsad usab ang China og ‘punishment’ drills sa palibot sa Taiwan human sa inagurasyon ni Lai diin gitawag sa China ang ilang tubag sa separatist acts ni Lai diin nagpadala kini og mga armadong eroplano nga iggugubat ug naglunsad usab og mock attack, nga gitawag sa China og Joint Sword-2024A.
