MOALBOAL,CEBU- Hugot nga giimbestigahan sa Criminal Investigation and Detection kon CIDG ug Bureau of Immigration ang 38 ka mga undocumented Chinese National gikan sa gidudahang nag-operate og ‘ilegal nga POGO ‘ sulod sa gi-abangang Happy Bear Villa Resort sa Barangay Saavedra lungsod sa Moalboal, niadtong Miyerkules, Oktobre 9, 2024.
Anaa pa sulod sa maong resort ang mga langyaw ug ubos kini sa kustodiya sa Police Regional Office 7 aron makuhaan sila og pamahayag.
Nasayran nga niadtong Septembre 24, 2024 nagsugod sa ilang operation ang maong mga ‘Chinese National’ diin ilang giabangan ang tibuok resort sa kantidad nga P200,000 matag buwan.
Gipanag-iya sa usa ka langyaw ang maong resort, apan ang asawa niini kay usa ka Filipina.
Sa pakighinabi sa Bombo Radyo Cebu kang Police Captain Brigidio Paca II, ang Officer-in-Charge sa Moalboal Police Station, iyang gipahibalo nga nagpadayon pa ang ilang imbestigasyon kon tinuod ba nga adunay ‘POGO operation’ nga gibuhat ang mga Chinese National sa naasoy nga lugar.
Sa nasangpit nga raid nasakmit sa mga otoridad ang 34 ka kompyuter, upat (4) ka laptop, ug 200 ka smartphones.
Dugang pa, nga nagsugod ang imbestigasyon sa mga otoridad human nakadawat og kadudahang hangyo ang lokal nga kagamhanan sa Moalboal, Cebu ngadto sa nahisgutang establisemento nga magbutang og ‘high-speed internet connection’.
Dinhi nagduda ang mayor sa lungsod nga si Mayor Inocentes Cabaron, hinungdan nga ilaha kini nga gisusi sa kabomberohan alang sa usa ka fire-safety inspection.
Didto, nakit-an ang labing minos traynta (30) ka mga Chinese nga dali dayon nga gi-scout aron ilusad ang maong ronda.(With Report of Bombo Koky Cabatingan)
