DALAGUETE, CBEU-Gipasakahan og laing reklamo sa buhatan sa National Bureau of Investigation – Central Visayas (NBI-7) si Dalaguete, Cebu Mayor Ronald Allan “Ronnie” Cesante kabahin sa anomalosong road concreting project niini sa Barangay Población sa samang lungsod.
Gisang-at ang maong reklamo ni Engr. Ildebrando Almagro, kinsa kanhi municipal engineer nga matod niya nga bisan pa man nga adunay pribadong contractor ang maong proyekto apan nganung adunay mga job order employees gikan sa munisipyo ang mitrabaho lakip na mga ekipo sa kagamhanang lungsod.
Sa eksklusibong pakighinabi sa Bombo Newsteam kang Engr. Almagro, ang reklamante sa maong gipasakang reklamo diin tataw niya dili “politically motivated” ang iyang pagpadangat sa NBI-7 apan aksyon lang niya kini isip magbubuhis og nakita niya nga ang maniobra sa kagamhanang local tungod usa pud ni siya ka inhenyero.
Dugang niya nga nadasig kini sa pagpasaka sa reklamo tungod sa kalambuan sa laing kasong giatubang sa Mayor nga may kalabutan sa usa ka job order employee nga namatay kay gipatrabaho sa usa ka covered court nga walay safety equipments.
Matod ni Engr. Almagro nga P9.6 milyones ang balor sa kontrata sa maong proyekto ug iya kining gipanid-an tungod kay duol ra man kini sa iyang panimalay hinungdan nga matag adlaw niya kini ma-monitor.
Dugang niini nga iyang gikuhaan og mga hulagway ang mga trabahante nga kadaghanan kanila kaila niya nga personal nga nagtrabaho sa Munisipyo sa Dalaguete, Cebu.
Sa maong reklamo sab kay duna siyay geo-tag nga mga hulagway aron suportahan ang iyang alegasyon ingon man ang mga interbyu sa mga tawo sa palibot sa proyekto, aron pamatud-an ang iyang pamahayag.
Samtang sa habig usab ni Mayor Cesante kay misulti lang kini nga usa ka walay sumbanan nga akusasyon batok kaniya ug ingon man mosang-at siya sa iyang tubag sa higayon nga mahatagan siya sa NBI-7 og kopya sa reklamo ni Almagro.
