PROVINCE OF CEBU-Mimugna ang kagamhanang lalawigan sa Sugbo og Anti-Smuggling Task Force nga magbantay sa tobuok probinsya batok sa smuggling sa produkto.
Subay kini sa Executive Order nga gilagdaan ni Cebu Provincial Governor Gwendolyn Garcia nga E.O no. 16 s. 2024 nga giilang “Creation of Anti-Smuggling Inter-Agency Task Force in the Province of Cebu”.
Nunot kini sa hulga nga ang lungsod sa Dumanjug sa habagatang Sugbo diin gi-relibohan sa posisyon ang Hepe sa ilang kapulisan ug and Deputy niini tungod sa kalambigitan sa smuggling sa mga baboy nga gikan sa isla sa Negros.
Ang maong pagrelibo sa pwesto subay sa kamaduan ni Police Regional Office – Central Visayas (PRO-7) Director Police Brigadier General Anthony Aberin.
Gipaambit dayon kini sa opisyal kang Cebu Provincial Police Office (CPPO) Director Police Colonel Percival Zorrilla kinsa nakigtagbo kang Governor Gwen aron sulbaron ang maong kalapasan.
Gilangkoban ang maong Task Force sa mga sakop sa kapulisan, kasundalohan, ug sa Coast Guard nga gipangulohan ni PBGEN Aberin, Director sa PRO-7 ug Vice-Chairpersonships nila Commodore Florante Gagua sa Naval Forces Central; Commodore Weniel Azcuna sa PCG District-7; ug ni PBGEN, Jonathan Cabal sa Maritime Police-7.
Lain sakop sa Task Force kay mao ang buhatan sa Cebu Port Authority, Department of Agriculture-7, Maritime Industry Authority-7, League of Municipalities in the Philippines Cebu Chapter, Provincial Veterinarian Office, ug mga mayor sa lungsod sa Barili, Dumnajug, Alcantara, Ronda, Moalboal, Badian, Samboan, Alegria, Ginatilan, Malabuyoc, ug Santander tungod sa proximity niini sa isla sa Negros diin tinubdan sa smuggled nga mga baboy.
Dili lamang kni limitado sa produktong baboy o hayop kon dili lakip na ang laing mga kargamento aron sa pagsubay sa saktong mga permiso sa mga inangkat ug sa kaluwasan niini sa mga konsumidor.
