CEBU CITY- Gikinahanglan nang mokuha og permit kung manaygon ka sa mga panimalay ug mga kadalanan karong panahon sa pasko diri sa dakbayan sa Sugbo.
KIni ang gipahibalo sa mga kadagkoan sa Anti-Mendicancy Board atol sa press conference niini sa Cebu City Hall kagahapong adlawa sa Lunes Nobyembre 4, 2024.
Diin matod pa sa maong Board nga nagtumong kini sa kaluwasan ug kahapsay atol sa panahon sa pasko.
Sa pamahayag ni Dr. Lucille Mercado, ang Chairperson sa Cebu City Anti-Mendicancy Board diin mipasabot nga samtang dili diretsong idili sa kagamhanang dakbayan ang pagpanaygo, tinguha niini nga ma-regulate ang kalihokan aron maprotektahan ang mga carolers ug residente.
Kini nga mga permiso, nga makuha gikan sa Office of the Mayor sa kagamhanang dakbayan sa Sugbo, kabahin sa paningkamot sa dakbayan sa pagmentinar sa kahapsay sa mga pampublikong lugar.
Samtang sa managlahing pakighinabi sa media, si Cebu City Mayor Raymond Alvin Garcia namahayag nga suportahan niya ang programa sa board apan nipasalig nga makighiabi usa kini sa Business Permit and Licensing Office (BPLO) bahin sa paghimo sa proseso nga accessibility sa publiko ug sa posibilidad nga mahimong ipa-agi online ang registration.
Dugang niini nga ang kagamhanang dakbayan dili manukot og bayad sa pagproseso sa naasoy nga permit.
Ingon man nga kadtong mopadayon sa pagpasundayag sa mga pampublikong sakyanan hatagan og tiket gikan sa Cebu Environmental Sanitation Enforcement Team (CESET) ug pamultahon og P1,000.
Kadtong dili makabayad sa multa adunay kapilian sa pagkompleto sa upat ka oras nga serbisyo sa komunidad, nga naglakip sa paglimpyo ug pag-declogging sa mga kanal ug pagmentinar sa mga pampublikong parke.
