Nipadayag og kasagmuyo si Manila 3rd District Rep. Joel Chua, sa kantidad nga nagasto sa OVP ug DepEd nga mahulagway nga “improper” ug “unexplained” expenditures sulod sa duha ka tuig.
Diin gibanabana nga moabot sa P612.5 milyones ang kinatibuk-ang pundo ubos sa confidential funds nga gigasto ni Bise Presidente Sara Duterte ubos sa Office of the Vice President ug Department of Education.
Sa opening statement ni Chua, nasagmuyo siya sa daghang findings sa House Blue Ribbon Committee tungod kay nakita kung giunsa paggamit ug gasto ang confidential funds sa OVP ug DepEd nga gihatag sa maong mga ahensya niadtong 2022 ug 2023.
Nagserbisyo si VP Sara isip DepEd Secretary gikan Hulyo 2022 hangtod sa iyang pag-resign niadtong Hulyo 2024.
Nangutana si Chua kon asa nagasto ang P612.5 milyones nga confidential funds, apan nasagmuyo si Chua nga pipila lang ka opisyal ang nitestigo samtang ang mga direktang responsable sa pag-disbursement sa pundo kay wala motambong sa hearing.
Giinsister ni Chua nga duha ra ka tawo ang makatubag sa pangutana, sila si VP Sara ug ang Special Disbursement Officer (SDO), Ms. Gina F. Acosta para sa OVP ug Mr. Edward D. Fajarda para sa DepEd.
