CEBU CITY-Girekomendar ang full rehabilitation sa Cebu City Sports Center (CCSC) track oval human sa inspeksyon sa konseho sa dakbayan.
Diin gipangulohan ni City Councilor Jerry Guardo, ang chairman sa infrastructure committee, ang gihimo nga assessment ug nikompirmar sa dakong kadaot sa rubberized track nga nagkinahanglan og dinaliang pag-ayo ilabi na sa pagpahigayon sa Sinulog Festival sa Enero sunod tuig.
Sa iyang pagsusi, uban sa manager sa CCSC nga si Jovito Taburada ug sa mga opisyal sa Department of Engineering and Public Works, kay nasuta ni Guardo nga ang kadaot anaa sa tuo nga bahin sa oval nga nag-atubang sa grandstand.
Matod ni Guardo, ang track nagkinahanglan og comprehensive overhaul ug dili limitado sa spot repairs.
Subay niini, si Mayor Raymond Alvin Garcia niingon nga iyang gipaabot nga mahuman ang trabaho sa Disyembre, ug gipasiugda nga magdepende kini kung kanus-a hingpit nga mayo ang bag-ong goma.
Gipahibalo usab nga ang track oval sa Cebu City Sports Center (CCSC) sirad-an alang sa pag-ayo sugod karong adlawa, Nob. 13, 2024.
Diin ang rehabilitasyon sa track oval nga napuno sa kontrobersiya human nalangan ang pag-ayo ug pag-instalar sa bag-ong goma niadtong Mayo, usa ka tuig human gisirad-an ang pasilidad isip pagpangandam sa pag-host sa 2024 Games sa Hulyo.
