Nagbilin ug kinatibuk-ang P40,675,916.70 nga danyos, ang kataposang upat ka bagyo nga miigo sa Pilipinas matod sa National Electrification Administration (NEA).
Kini naglakip sa mga bagyong ‘Marce’ (Yinxing), ‘Nika’ (Toraji), ‘Ofel’ (Usagi), ug ‘Pepito’ (Man-Yi).
Base sa gipagawas nga report sa NEA Disaster Risk Reduction and Management Department (DRRMD), adunay 21 ka probinsiya gikan sa pito ka rehiyon sa tibuok nasod ang kanunay nga gimonitor human ma-report ang sobra nga kadaot nga gibilin sa upat ka mga bagyo.
Ang mga kooperatiba sa elektrisidad sa kini nga mga probinsya nagtaho nga pipila ka mga linya sa transmission ug mga pasilidad sa transmission ang nadaot sa bagyo.
Samtang, sa pinakaulahing datus nunot sa pagkaguba sa ST Pepito sa dakong bahin sa Luzon, ang NEA mitaho nga adunay kapin sa 200,000 ka power consumers ang apektado tungod sa partial ug total power interruption.
Sa Nueva Vizcaya, adunay 118,000 ka mga konsumidor ang apektado samtang 54,266 ang sa probinsya sa Quirino.
Ang duha ka mga probinsiya parehong gikan sa Cagayan valley, diin ang bagyo miagi human sa pag-landfall niini sa probinsya sa Aurora.
Sa Bicol Region, ang Catanduanes nitaho nga 60,657 ka mga konsumidor sa kuryente ang naapektuhan human mi-landfall ang bagyo sa maong probinsiya.
Sa probinsiya sa Aurora, anaa sa 63,101 ka konsumidor ang nawad-an og suplay sa kuryente.
Sa pagkakaron, padayon pa ang pag-ayo sa mga pasilidad ug transmission lines nga naapektuhan sa kataas sa bagyo.
