CEBU CITY- Gipahimangnoan sa mga prayle sa Basilica Minore del Sto. Niño de Cebu ang mga kandidato sa umaabot nga Midterm Elections nga dili gamiton sa pagpangampanya ang selebrasyon sa Fiesta Señor.
Kini ang nahimo nga panawagan sa mga prayle sa Basilica Minore del Sto. Niño de Cebu nga ni-discourage sa tanang politiko sa pagpahimulos sa Fiesta Señor alang sa politikanhong katuyoan, karung adlawa Martes, Nobiyembre 19,2024.
Matod ni Fr. Jules Van Almerez, media liaison sa Basilica, nga giisip gihapon sila nga mga deboto, apan inig sulod nila sa Basilica,dili lang unta nila sagolan og political touch.
Gidugang ni Fr.Almerez, nga kutob sa mahimo, kinahanglang magsul-ob og attire ang mga politiko nga haom sa relihiyosong okasyon.
Iyang gidasig ang mga politiko nga mosalmot sa selebrasyon isip mga deboto ug molihok isip usa.
Bisan og wala maghisgot si Almerez kung tugotan ba nila o dili ang bisan kinsa nga magsul-ob og t-shirt nga adunay sulod nga kampanya, apan nanghinaut siya nga ang mga politiko magsul-ob og tukma sa okasyon./
Ang opening salvo o ang pagsugod sa siyam ka adlaw nga novena kay sa umaabot nga Enero 9, 2025, samtang ang pista sa Enero 19, 2025.
Ang tema sa ika-460 nga Fiesta Señor mao ang:“Santo Niño: Hope of the Pilgrim Church.” o “Santo Niño: Paglaum sa Pilgrim Church.”
