CENTRAL VISAYAS-Hingusog nga gikandadohan sa Bureau of Internal Revenue – Central Visayas (BIR-7) ang usa ka Chinese restaurant ug usa ka bodega tungod sa mga kalapasan sa pagbayad sa buhis kaniadtong Huwebes, Nobiyembre 28, 2024.
Ang mga opisyal sa BIR Revenue District Office No. 81 mipatuman sa “Oplan Kandado” sa 88 BBQ House nga nahimutang sa Barangay Mabolo, Dakbayan sa Sugbo, ug usa ka bodega sa Barangay Subangdaku, Dakbayan sa Mandaue, tungod sa “under-declaration” sa buhis sa babayeng tagiya niini.
Sa eksklusibong pakighinabi sa Bombo Newsteam kang BIR-7 Legal Officer Atty. Jay Rozen Bartazan, diin ang basihan sa Oplan Kandado mao ang mga taxpayer nga adunay under-declaration nga mas labaw sa 30 porsiyento ug mga establisemento nga walay rehistro.
Matud ni Bartazan, nakalapas sila sa Seksyon 115 sa National Internal Revenue Code (NIRC) of 1997 mao nga gisuspenso nila ang negosyo sa mga nakalapas.
Ang pakyas nga pag-isyu og resibo, pag-file sa Value-added Tax (VAT) returns, ug sa pag-understate sa taxable sales o kita nga mas taas sa 30 porsyento, usa ka kalapasan ug duna kini multa.
Sa pagsira sa maong Chinese restaurant kay anaa diha ang tag-iya niini kinsa nahibulong sa nahitabo.
Gipasabot siya sa BIR Legal Division bahin sa ilang mga nalapas.
Ang bodega sa Mandaue bakante na ug wala nay mga butang sa dihang ila kining giadto, apan bisan pa niini, ilaha gihapong gipaskin ang closure order.
Mipasidaan ang BIR nga kun gamiton og balik ang bodega nga mao gihapong negosyo sa maong negosyante makasohan na kini ubos sa Section 151 sa Revised Penal Code.
Leksyon kini sa ubang mga magbubuhis nga kinahanglang motuman gyud sa mga regulasyon.
