CEBU CITY-Natabunan sa midahiling yuta gikan sa usa ka condominium ang gibana-bana nga anaa sa tulo ka balay sa Sityo Kalma, Barangay Tisa, dakbayan sa Sugbo, gabii Disyembre 1, 2024.
Kini human sa kusog nga pagbunok sa uwan nga miresulta sa pagkatumpag sa koral/paril sa usa ka subdivision nga “Urban Deca Homes”.
Lakip sa mga nahunlakan sa paril, mao ang panimalay sa magtiayong Batin nga natanggong sa sulod sa ilang balay.
Giila ang magtiayon nga sila si Lisa Batin, 40-anyos ug si Liderato Batin, 49-anyos kinsang nakuha human sa kapin 6 ka oras nga paningkamot sa mga rescue operation aron luwas kini nga marescue.
Sa eksklusibong pakighinabi sa Bombo Radyo Cebu kang Carlo Fernandez, ang Secretary sa Barangay Tisa diin sa ilang inisyal nga imbestigasyon nahugno ang paril tungod sa huyang nga pundasyon niini ug nigrabe tungod sa kapin usa ka oras nga pagbunok sa uwan hinungdan sa maong insidente.
Dugang pa nga posibling gagmay nga kabilya o substandard ang sukod ang gigamit sa pagtukod sa paril nga wala man gani presensya sa horizontal beam nga matod pa gihansakan ra og anapog.
Kalabot sa maong insidente, makig-estorya ang opisyal sa management sa nasangpit nga edipisyo alang sa ilang liability ug obligasyon sa mga pamilyang apektado sa insidente.
