CEBU CITY-Gipahibalo ni Cebu City Mayor Raymond Alvin Garcia, nga opisyal niya nga giimbitar si Presidente Ferdinand Marcos Jr. nga motambong sa Sinulog Festival 2025.
Mao kini ang gianunsyo ni Garcia aron makigsaulog ug mamulong sa kalihokan.
Dugang pa niya nga ilhon ang mga incumbent ug reelectionist nga mga senador, apan dili hatagan og kahigayonan sa pakighinabi niini, aron mapugngan nga gamiton ang dakong kapistahan isip plataporma sa politikanhong kampanya.
Gani, sigurohon ni Garcia nga magpabiling dili masagulan og pa-molitika ang kalihukan hinungdan nga hugot ang iyang pakig-alayon sa Sinulog Foundation Inc.
Kini subay sa nagkaduol nga ‘midterm election’ sa Mayo 2025, uban sa daghang mga senatorial aspirants nga gilauman nga mangita sa visibility sa high-profile festival.
Subay niini, gilauman nga mahimong labing dako ug labing maluho sa kasaysayan sa Sugbo ang umaabot nga Sinulog Festival 2025 tungod sa pagtinabangay tali sa Cebu City ug Cebu Province.
Sa pagkakaron, 38 na ka mga contingent ang nagkumpirmar sa ilang partisipasyon, nga nagrepresentar sa taas nga pagtubo sa 21 ka kinatibuk-ang partisipante gikan sa 2023 nga edisyon.
Gipaabot usab ni Garcia nga mokabat sa 3 milyones ang motambong tungod kay ang festival mobalik sa naandan nga lugar niini, diin mao ang Cebu City Sports Center (CCSC).
