CENTRAL VISAYAS- Nipasalig ang Commission on Human Rights (CHR)-7 nga kawalay pagpihig ug dili ma-impluwensiyahan ang ilang imbestigasyon sa pagkasikop ni kanhi Cebu City administrator Collin Rosell sa Cebu City Hall.
Sa pakighinabi sa Bombo Newsteam kang CHR-7 Director Arvin Odron, iyang gikompirmar nga nakadawat na sila og direktiba gikan sa CHR Central Office nga mohimo og imbestigasyon sa reklamo ni Rosell, nunot sa pagkasikop niini sa Cebu City Hall niadtong Nobiyembre 8.
Sa pagkadawat sa direktiba, si Odron niingon nga nakig-alayon sila kang Rosell, ang gitumbok nga biktima sa kaso.
Matod niya nga ang kaso ni Rosell maoy usa sa ilang gi-review isip pag-obserbar sa National Human Rights Consciousness Week.
Hinuon iyang gipasalig nga tukion nila pag-ayo kining maong kaso nga gimando sa ilang Central Office.
Dugang pa, si Odron miingon nga gusto nila nga ipadayon ang ilang “independence” isip institusyon sa tawhanong katungod ug garantiya nga magpabilin silang neutral aron makaabot sa usa ka walay gidapigan nga paghukom.
Gihatagan niini og gibug-aton, nga hatagan og tukmang proseso ug panahon ang respondent nga si Cebu City Police Office (CCPO) Director Police Colonel Antonietto Cañete aron makasumite sa iyang counter-affidavit.
Bisan pa niini, gikompirmar ni Odron nga aduna nay inisyal nga komunikasyon ug paningkamot nga gihimo sa ilang investigation department kalabot sa kaso.
Dugang pa, si Odron namahayag nga ilang i-require si Rosell nga mosumiter sa iyang affidavit complaint.
Kadtong giila nga mga respondents ipatawag usab pagkahuman.
Una niini, ang CHR ug PNP naglusad og imbestigasyon matag usa batok kang Cañete ug CCPO Police Station 3 Commander John Lynberth Castigador Yango, ug uban pa, kalabot sa pagkasikop ni Rosell sa miaging buwan.
Kini isip tubag sa hangyo sa kampo ni kanhi mayor Michael Rama nga imbestigahon sila si Cañete ug Yango.
