CEBU CITY-Gisugat og ‘BOO’ ang pipila ka mga opisyales sa Kaulohan sama nila ni Senador Riza Hontiveros ug Kanhi Senador Bam Aquino, ingon man Senador Kiko Pangilinan sa dihang tumong ra unta sa Cebu City Sports Center kay motan-aw sa Sinulog 2025.
Wala maka-ikyas sa mga pagsaway gikan sa pipila ka mga Sugbuanon ang mga opisyales kalabot sa init nga mga isyu sa niaging tuig ug hangtod karon padayon gihapon nga gituki tungod sa epekto niini sa mga Pilipino.
Human sa kusog nga boo sa mga tawo, gisundan dayon kini sa pag-singgit sa pangalan sa Pamilyang Duterte.
Gawas niini, daghan usab nga reklamo ang nadawat sa event organizer, apil na ang mga nadestino nga security personnel gikan sa mga contingents ug kadtong mitambong, tungod sa kakuwang sa crowd control measures.
Diin ang pipila ka mga contingents ang nakahukom nga dili nalang moapil sa street dancing parade ug i-risgo ang kaluwasan sa mga bata tungod sa kadaghan sa mga tawo ug paghuot, dugang pa sa init nga panahon.
Hinuon, mabulukon ug malampuson nga nahuman ang 43 ka contingents sa ilang paghalad alang sa Sr. Santo Niño.
Ingon man nga ang Bais City maoy gideklarar nga kampiyon sa Free Interpretation Category, nga makadawat og P3,000,000, gisundan sa Toledo City, 3rd Place: Lapu-Lapu City, 4th Place: Lumad Basakanon, ug 5th Place ang Consolacion.
Samtang, sa Sinulog-Based Category, ang midaog mao ang Carcar City kinsa makadala usab og P3,000,000, gisundan sa Mandaue City, Talisay City sa ikatulong dapit, 4th Place: Danao City ug 5th Place: Barangay Inayawan.
Hinungdan nga gikan sa kasing-kasing ni Cebu City Mayor Raymond Alvin Garcia ang iyang pasalamat, aron makab-ot ang labing dako. labing engrande nga Sinulog sa kasaysayan sa Sugbo.
Samtang, gianunsyo usab ni Garcia nga sa sunod tuig sa samang lugar kay mag-abot gihapon ug maghiusa ang tanan tungod kay sa CCSC gihapon ipahigayon ang Sinulog 2026.
