CEBU CITY-Nagtapok ang kapin sa 100 ka mga pulis gikan sa Regional Mobile Force Battalion sa Central Visayas sa Camp Sotero Cabahug sa Gorordo Avenue sa dakbayan sa Sugbo alang sa tradisyonal nga boodle fight aron sa pagsaulog sa malampuson ug malinawon nga pagpahigayon sa Sinulog 2025.
Ang boodle fight nga gipangulohan ni Police Colonel Enrico Figueroa, ang acting director sa Cebu City Police Office (CCPO), usa ka pagpakita sa panaghigalaay ug pagpasalamat sa mga pulis, uban sa mga personahe sa Armed Forces of the Philippines (AFP), Bureau of Fire Protection, ug uban pang ahensya sa gobyerno nga nakatampo sa pagsiguro sa seguridad atol sa kalihokan.
Nipadayag si Figueroa sa iyang pasalamat ngadto sa mga opisyal ug uban pang mga personahe sa ilang kahago, bisan pa sa kakapoy nga ilang nasinati, sa pagpatunhay sa kalinaw ug seguridad atol sa usa sa labing dakong kapistahan sa Central Visayas.
Matod ni Figueroa nga ang paningkamot sa Cebu City Police Office kay gidayeg dili lang sa Police Regional Office sa Central Visayas kon dili lakip na sa tibuok Philippine National Police (PNP) organization.
Diin bisan paman sa ilang nasugatan nga mga hagit sama sa pagdumala sa pagdagsa sa mga tawo ngadto sa pagsulbad sa potensyal nga mga hulga sa seguridad, apan pinaagi niining tanan, gipakita nila ang kalig-on, pagtinabangay, ug usa ka maayo nga pagbati sa pag-alagad.
Dili lang usab sa mga sakop sa kapulisan ang iyang gipasalamatan tungod kay mipaabot usab siya sa iyang pasalamat sa katawhan sa Sugbo sa ilang kooperasyon.
