Hugot nga gipasiugda karon sa Department of Information and Communications Technology ang pagkat-on sa ‘cyber hygiene’ dili lang sa publiko apan labi na sa mga batan-onan.
Ilang giawhag ang publiko nga magkat-on sa pag-amping sa matag transaksiyon ug uban pang mga online nga kalihokan nga gikahadlokang makahatag og risgo sa usa ka indibidwal.
Mismo si Secretary Ivan John Uy sa Department of Information and Communications Technology (DICT) miinsister nga kinahanglang makat-on dayon ang bata unsaon pagpanalipod sa iyang kaugalingon kung makagamit na siya og smartphone.
Matud niini nga giduso ang cyber hygiene, aron makat-on nga mas mag-amping pa sa transactions online.
Gipasabot sa kalihim sa nasangpit nga departamento nga ang cyber hygiene dili lang usa ka technical skill kon dili makonsiderar usab nga life skill nga importanteng itudlo sa mga batan-on.
Samtang, sa pagsulod sa bag-ong buwan, nipagawas na usab og pasidaan si Secretary Ivan John Uy karong gitawag og love month.
Naatol kini sa gipaabot nga pagsaka sa natala nga kaso sa mga love scam nga mabiktima sa mga mangingilad.
Busa, iyang gitambagan ang publiko nga mag-amping sa ilang mga kalihokan online.
