Gihimakak ni Manila 3rd District Representative Joel Chua nga gidali sa House of Representatives ang proseso sa impeachment batok kang Bise Presidente Sara Duterte.
Diin usa si Cong. Chua sa 11 ka mga kongresista nga nagsilbi sa House prosecution panel alang sa impeachment ni VP Sara.
Sa usa ka press conference, ang magbabalaod, kinsa usa usab ka abogado, niingon nga ang mga aksyon nga gihimo sa Ubos Balay Balauranan sa Kongreso kay konstitusyonal o nalatid sa balaod.
Matod niya nga gilauman na usab ang maong mga pasangil sa Partido Demokratiko Pilipino Lakas ng Bayan (PDP-Laban).
Diin una nang gipadayag sa Partido nga gipangulohan sa amahan ni VP Sara nga si kanhi Presidente Rodrigo Duterte sa usa ka pamahayag ang hilabihang kasuko ug pagkondenar sa ilang giingon nga dinalidali nga impeachment, nga klarong pagpakita sa hugaw nga politika sa nasud.
Dihang gipangutana ang magbabalaod bahin sa ikaupat sa 7 ka articles of impeachment batok ni VP Sara kalabot sa giingong wala mapasabot nga pagdaghan sa iyang bahandi ug kapakyas sa pagbutyag sa iyang Statement of Assets, Liabilities, and Net Worth (SALN).
Matud ni Chua nga basi kini sa gibutyag ni kanhi Sen. Sonny Trillanes atol sa House Quad Committee hearing niadtong Nobyembre sa miaging tuig diin si kanhi Presidente Rodrigo Duterte ug iyang pamilya giingong nakadawat og P2.4 bilyones nga deposito sa bangko.
Hinuon, niinsistir si Chua nga adunay daghang ebidensiya sa unang 3 lang ka artikulo sa impeachment, apil na ang giingong panagkunsabo sa pagpatay kang Presidente Ferdinand Marcos Jr., First Lady Liza Marcos ug House Speaker Martin Romualdez kon mapatay si VP Sara, ingon man ang malversation of confidential funds ug bribery ug corruption sa DepEd niadtong panahon sa administrasyon ni VP Sara.
Samtang sa habig ni VP Sara, una na niyang gipahayag nga dili siya mo-resign taliwala sa nagsingabot nga impeachment trial batok kaniya sa Senado.
