CENTRAL VISAYAS-Miabli og bag-ong testing center ang buhatan sa Professional Regulation Commission Central Visayas (PRC-7) diri sa dakbayan sa Sugbo, Lunes, Pebrero 10, 2025.
Kung diin ang maong pasilidad kay gitanyag isip usa ka Computer-Based Licensure Examination (CBLE) ug regular testing center nga nahimutang sa 4th Floor, GMC Plaza bldg., sa dalan MJ Cuenco Avenue, Barangay San Roque ning dakbayan sa Sugbo.
Makaserbisyo kini sa pagpalambo sa accessibility sa licensure examination sa Central Visayas diin aduna kiniy sa dili muminos 282 ka mga laptop ug cubicles aron gamiton sa mga examinees sa panahon sa eksaminasyon.
Nagtumong kini sa pag-convert sa tanan manual examinations ngadto na sa computer-based exams.
Gipanguluhan ang pormal nga pagbukas sa pasilidad sa mga kadagkuan sa PRC Central Office ug Regional Office lakip na ni Commissioner Atty. Erwin Enad ug ni PRC-7 Regional Director Narcival Taquiqui.
Sa kasamtangang aduna nay walo (8) ka mga CBLEs ang PRC diin ang natukod sa Sugbo mao ang pinakabag-o nga plano pang paladpan sa Second Phase sa maong pasilidad sa samang building.
Mag-uban kini sa nationwide network sa PRC sa mga pasilidad sab niini sa kaulohan, Ilocos Region, CALABARZON, Bicol Region, Western Visayas, Northern Mindanao, ug Davao Region kung sa higayong magpahigayon og ekaminasyon para sa mga umaabot propesyonal.
