CENTRAL VISAYAS- Gihingusgan sa Commission on Elections in Central Visayas (Comelec-7) ang ilang monitoring efforts sa upat ka mga dapit sa Sugbo tungod sa “intense political rivalry” sa mga lokal nga kandidato sa wala pa ang Mayo 2025 nga eleksyon.
Kini ang gitino ni Comelec-7 Regional Director Atty. Francisco Pobe, nga ang ilang monitoring nakatutok sa Cebu City, Mandaue City, ingon man sa 2nd ug 4th districts sa Cebu Province.
Hinuon, giklaro ni Pobe nga kining upat ka mga lugar wala pa giklasipikar nga “area of concern” apan ubos na hinuon sa “area of monitoring.”
Bisan pa sa tensiyon sa politika, si Pobe miingon nga ang Central Visayas nagpabiling malinawon sa kinatibuk-an bahin sa armadong komprontasyon ug kapintasan nga may kalabotan sa eleksyon.
Apan, iyang gipasiugda ang panginahanglan sa pagbantay.
Subay niini, ang Comelec-7 nakigtambayayong usab sa Philippine National Police (PNP) ug Armed Forces of the Philippines (AFP) sa paghimo og threat assessments ug pagpatuman sa mga lakang sa seguridad.
Matod ni PCol. Arvie Aserre Paraon-Bueno, tigpamaba sa Police Regional Office-7, ang pagpangandam sa seguridad gipahaom sa panginahanglan sa matag lugar.
Hinungdan, nga adunay usa ka Regional Security Meeting ang gihimo aron mapalig-on ang koordinasyon sa mga ahensya nga nagpatuman sa balaod.
Ang Comelec-7 nag-awhag sa publiko nga magpabiling mabinantayon ug aktibong mag-monitor sa mga kalihokan sa eleksyon aron masiguro ang transparency ug patas.
Gipahinumdoman usab ni Pobe ang tanang kandidato sa pagsunod sa mga balaod sa eleksyon ug paglikay sa bisan unsang matang sa electoral misconduct.
