Naghinam-hinam na ang mga student-athletes nga morepresentar sa Cebu City School Division Office alang sa 2025 Central Visayas Regional Athletics Association (CVIRAA) Meet nga ipahigayon sa Bayawan City, Negros Oriental karong Marso 10, 2025.
Kini maoy gipaambit ni Francis Ramirez, ang Division Sports Officer sa Cebu City Niños nga nagrepresentar sa Cebu City Local School Division diin nakadaog sila sa City Olympics, pipila ka buwan ang milabay, aron makigsangka sa ubang mga student-athletes nga nagbase sa Central Visayas.
Dako ang pagsalig sa opisyal sa delegado sa dakbayan sa Sugbo nga makalangkat sila og mga medalya ilabi na nga pipila na ka tuig ang ilang pagpangulo sa natad sa youth sports sa Central Visayas.
Karong tuiga, kapin sa 1,000 ka personnel ang gipakatap sa Cebu City Niños delegation apil na niini ang mga atleta, coaches, trainers, chaperones, ug daghan pang uban nga nagtinguha nga mahimong kampiyon pag-usab karong tuiga.
Kahinumduman nga niadtong CVIRAA 2024, nga gipahigayon sa Cebu City nakadaog isip kampiyonato ang Cebu City nga adunay 118 ka bulawang medalya, 73 ka silver medals, ug 78 ka bronze medals.
Diin ang ilang pinakasikit nga kaatbang mao ang Dumaguete City nga anaa sa ikaduhang dapit sa nakuhang 41 gold medals, 44 silver medals, ug 33 bronze medals; Samtang ang Bohol Province ang sa ikatulog dapit s 38 gold medals, 48 silver medals, 56 bronze medals; Ika-upat nga dapit ang Mandaue City nga anaay35 gold medals, 35 silver medals, ug 49 ka bronze medals.
Samtang ang Cebu Province ang mikumpleto sa top 5 nga anaay 32 gold medals, 43 silver medals, 62 bronze medals. | via Bombo Jairah Camello
