Nagtingkagol sa Mandaue City Police Station ang 62-anyos nga lalaki nga nasamiktan g dul-an sa P10.2 milyones nga kantidad sa illegal nga drugas atol sa gipahigayon nga buy bust operations sa Zone 7, Barangay Mantuyong, Mandaue City niadtong Marso 4.
Giila ang dinakpan nga si alyas “Ackoie”, 62-anyos, usa ka High Value Individual, nga taga F. Sabellano St. Quiot Pardo, Cebu City, usa ka “pusher”, ug nakuha sa iyang posesyon ang binulto nga gidudahang shabu nga motimbang og dili mominos 1.5 kilo ug gibana-banang mobalor og P10.2 milyones ka pesos.
Gawas sabinultong giingong shabu kay narecover sa posesyon sa suspek ang buy bust money, usa ka mobile phone, ug usa ka bag.
Matud ni Police LT. COL. Mercy Villaro, ang tigpamaba sa MCPO nga ang maong suspek nga si Ackoie kay gikataho nga makadispose og dul-an 1 ngadto sa 2 ka kilo sa shabu matag semana, ug ang mga pag-baligyaan niini mao ang mga tri cities sa sugbo.
Dugang pa ni Villaro nga giingong magkuhaan og supply sa iyang pag-umangkon nga kasamtangan nabalhog karon sa Mandaue City Police Office.
Gikatakdang pasakaan na kini og kasong kalapasan sa Sections 5 and 11, Article II of Republic Act (RA) 9165 (Comprehensive Dangerous Drugs Act of 2002).
- Laing lima ka drug personalities, nasikop sa managlahing buy-bust sa dakbayan sa Sugbo
Samtang, lima ka mga drug personality ang nasikop sa managlahing anti-illegal drug operations nga gipahigayon sa Cebu City Police Office niadtong Marso 4, sa Barangay Kalunasan, Lorega San Miguel ug Ermita sa dakbayan sa Sugbo.
Ang mga operasyon nisangpot sa pagkasakmit sa ilegal nga drugas nga mobalor og P7.6 milyones.
Giila ang dinakpan nga si Yori, 40-anyos, residente sa maong dapit diin nakuhaan og usa ka bulto sa gituohang shabu nga motimbang og 1,025 gramos, nga gibana-banang mobalor og P6,970,000.
Matod sa usa ka operatiba sa Guadalupe Police Station, ilang gipanid-an ang mga ilegal nga kalihokan ni Yori, hinungdan nga nag-aghat sila sa paghimo og case buildup.
