LAPU-LAPU CITY,CEBU- Nagbugno ang mga estudyante sa usa ka eskwelahan sa Lapu-Lapu City human giingong gitawag siya niini og “bati’g nawong” niadtong Marso 4, 2025.
Ang away nga naglambigit sa mga babayeng tinun-an nagsugod human ang Grade 10 student mibira sa buhok sa usa ka Grade 11 nga tinun-an agig balos human ang naulahi giingong nitawag kaniya og “bati’g nawong” sa Babag National High School.
Nakuha sa closed-circuit television (CCTV) camera ang panag-away sa duha ka babayeng estudyante diin miduyog ang ubang mga estudyante.
Human makitap ang naasoy nga CCTV, gipatawag ni Lapu-Lapu City Mayor Junard Chan sa iyang opisina ang grupo sa mga babayeng estudyante ug ang biktima.
Ang biktima nga Grade 11 nakaangkon og mga pangos, garas, ug nawad-an og kuko.
Apan gilimod niya ang pagtawag sa laing estudyante nga “bati’g nawong”.
Nakahukom ang iyang mga ginikanan nga ibalhin siya sa laing eskwelahan human sa insidente.
Subay niini, nangayo og pasaylo ang Grade 10 student sa nahitabo.
Siya ug ang laing estudyante moagi sa modular learning isip kabahin sa aksyong pagdisiplina sa eskwelahan.
Sa laing bahin, ang Violence Against Women and Children (VAWC) sa Dakbayan sa Lapu-Lapu, nikompirmar nga tulo ka sakop sa gang, lakip ang suspek, ang nalambigit sa physical assault sa laing Grade 8 student sa samang tunghaan niadtong Enero 13, 2025.
