MINGLANILLA,CEBU- Gimando ni Minglanilla Mayor Ragiv Enad nga imbestigahon ang viral social media video nga nagpakita sa kapin 60 ka mga langyaw nga nagsul-ob og itom, nagmartsa sulod sa usa ka subdivision sa Barangay Tubod niadtong Martes, Marso 4, 2025.
Makita sa video ang kapin sa 60 ka batan-on ug ligdong nga mga langyaw nga nagsul-ob og itom ug morag “nagmartsa” sulod sa subdivision sa Minglanilla Highlands sa barangay Tubod.
Subay niini, gipatawag ni Mayor Enad ang hepe sa Minglanilla police, nga si Police Chief Mark Leanza.
Dinhi, gi-report ni Leanza nga ang “lider” sa grupo usa ka American Derick Curry II miadto sa istasyon sa pulisya kaniadtong Marso 5 aron isulti nga ang 61 ka mga langyaw nga nakita sa video nahisakop sa usa ka relihiyosong grupo nga gitawag nga “Abayonaym or Those In Need of the Father.”
Dugang pa, nga gipasabot ni Curry sa kapolisan nga igo lang silang nagpahigayon og prayer meeting ug naglakaw sa ilang paggawas sa subdivision, nga wala makadisturbo sa mga residente.
Human sa inisyal nga imbestigasyon, si Leanza namahayag nga ang grupo wala maghatag ug hulga sa komunidad ug hingpit nga nakig-alayon.
Apan gimanduan ni Enad ang kapolisan nga palawman pa ang ilang imbestigasyon human nasuta nga 17 ka balay ang giabangan sa grupo sulod sa subdivision.
Nakadawat usab siya og mga taho nga dili kini ang unang higayon nga nagmartsa ang mga langyaw sa lugar, nga nagpatunghag kabalaka sa mga residente.
Giawhag pa ni Enad si Leanza nga makig-alayon sa mga ahensya sama sa Provincial ug Regional Intelligence Units aron mapalapdan ang imbestigasyon.
