Miabot na sa 221 ang patay tungod sa pagkahugno sa atop sa usa ka nightclub sa Dominican Republic niadtong Abril 8, 2025 ug kapin sa 500 na nga nasamdan.
Sumala sa mga opisyal, tali sa 500 ngadto sa 1,000 ka mga tawo ang anaa sulod sa club sa dihang nahugno ang atop samtang nag-perform ang sikat nga mag-aawit nga si Rubby Pérez, kinsa namatay usab sa insidente samtang ang iyang anak kay luwas.
Pormal nga natapos ang rescue operations niadtong Miyerkules sa gabii, ug nakatutok karon sa pag-rekober sa mga lawas ug pag-ila sa mga biktima.
Lakip sa namatay mao sila si Monte Cristi governor Nelsy Cruz ug kanhi MLB players Octavio Dotel ug Tony Blanco, ingon man adunay mga langyaw nga namatay gikan sa Haiti, Italy, France, ug Estados Unidos.
Samtang tulo ka adlaw nga nasudnong pagbangotan ang gipahibalo alang sa mga biktima.
Misaad usab ang gobyerno nga maghimo og usa ka imbestigasyon kauban ang lokal ug internasyonal nga mga eksperto aron mahibal-an ang hinungdan sa trahedya.
