Wala gikumpirmar o gilimod ni Atty. Martin Delgra kung usa siya sa duha ka Pinoy nga motabang sa defense team ni kanhi Presidente Rodrigo Duterte.
Sa usa ka pakighinabi ni Delgra sa The Hague Netherlands, gipangutana ang abogado kung bahin ba siya sa grupo sa depensa, apan wala kini gikumpirma o gilimod sa abogado.
Gipangutana usab siya kung unsa ang katuyoan sa iyang pagbisita sa The Hague, ug ang beteranong abogado nitubag nga bahin lang kini sa suporta nga iyang ipakita sa kanhi Presidente sa Pilipinas.
Sa sayo pa, gikompirmar sa lead counsel sa defense team sa kanhi Presidente nga si Nicholas Kaufman nga aduna usay Filipino nga maapil sa team nga modepensa sa kanhi Presidente sa kaso nga iyang giatubang sa International Criminal Court (ICC).
Sa laing bahin, una nang miinsistir si VP Sara Duterte nga ang defense team sa kanhi Presidente kay nagkinahanglan og Filipino nga abogado aron siya maoy mangunay sa pagpasabot sa mga balaod sa Pilipinas ngadto sa ICC.
