Gibanabana nga anaa sa 42 ka mga pasahero ang naangol human maaksidente ang usa ka pribadong jeepney sa Barangay Maninila, Miagao, Iloilo karung adlawa Abril 19, 2025 o Black Saturday.
Sa interview sa Bombo Radyo Iloilo kang Police Captain Francis Donne Lomahan, Hepe sa Miagao Municipal Police Station, gipahayag niini nga naggikan ang jeepney sa Barangay Baong, Alimodian, Iloilo ug padulong sa San Joaquin, Iloilo aron mag outing sa usa ka beach resort.
Sa inisyal nga mga taho nasayran nga ang mga naangol nga mga pasahero naglakip sa 13 ka mga menor de edad ug 19 ka mga hingkod, diin ang tanan gidala sa Guimbal District Hospital aron matambalan.
Dugang pa sa mga otoridad nga overloaded ang jeepney, gani adunay mga pasahero nga misakay sa atop.
Base sa inisyal nga imbestigasyon, posibleng nibuto ang ligid sa sakyanan nga maoy hinungdan sa aksidente.
Hinuon, nagpadayon pa ang dugang imbestigasyon.
