CEBU CITY- Nasikop na sa mga kapulisan sa Sugbo ang suspek nga nagpaluyo sa pagpusil-patay sa usa ka babayeng pasahero sa motorsiklo sa Cebu Business Park Brgy.Luz, Cebu City niadtong Abril 14, 2025.
Giila ang suspek nga si Russel Zapeda, 24, residente sa Brgy. Casili, lungsod sa Consolacion, amihanang Sugbo.
Giangkon ni Zapeda nga gisuholan siya sa pagpatay sa biktima nga si Frince Ordeniza sa kantidad nga P20,000.
Dugang sa suspek nga siya mibisita sa trabahoan sa biktima sa makadaghang higayon sa wala pa ang pagpamusil.
Human sa insidente sa pagpamusil, gibiyaan niya ang iyang motorsiklo, nag-ilis sa iyang sinina, ug misakay sa laing getaway vehicle. Ang duha ka sakyanan giingong gihatag sa ‘”mastermind” sa pagpatay.//
Gilaglag usab niini ang si Christopher Ian Marapoc nga maoy utok sa pagpamusil.
Sa pikas bahin, gitino ni Police Regional Office (PRO-7) regional director Police Brigadier General Redrico Maranan, uban si Cebu City Police Office (CCPO) city director Police Colonel Enrico Figueroa, gituman sa kapolisan ang ilang saad ngadto sa pamilya sa biktima nga madakpon ang suspek sa dili pa siya ilubong.
Nasuta nga ang biktima gikatakdang dad-on sa iyang katapusang pahulayan karong Domingo.
Kung kahinumduman, gilawman sa Cebu City Police Office (CCPO) ang ilang imbestigasyon lakip na ang backtracking, CCTV monitoring, ug pagsusi sa balay gipuy-an sa biktima diin ang point of origin sa iyang gi-book nga motorcyle-for-hire.
